Санъат қудратини эслатувчи байрам
«27-март – Халқаро театр куни» театр билан алоқадор барча инсонлар учун муҳим воқеадир. Бу театрнинг аҳамияти, унинг жамиятдаги ўрни ва бутун дунё бўйлаб одамларга илҳом бериш, эзгуликка даъват этиш қудратига эга эканлигини таъкидлаб ўтишимиз жоиздир. Ўзбекистонда театр санъати чуқур илдизларга ва бой тарихга эга, шу боис бу кунда театрларимиз ва уларнинг ходимлари эришган ютуқларни нишонлашимиз ҳамда эътироф этмоғимиз даркор.
Театр шунчаки санъат эмас. У ҳаёт, ҳис-туйғулар ва ғоялар кесишган бутун бир оламдир. Театр бизга ҳаётни турли томондан кўриш, бошқаларнинг ҳис-туйғуларини англаш ва муҳим масалалар ҳақида мушоҳада юритиш имконини беради. Ҳар бир спектакль томошабинлар қалбига таъсир эта оладиган бетакрор ҳикояга айланади. Ўзбекистонда театрлар мамлакат маданий ҳаётида алоҳида ўрин эгаллайди. Улар анъаналар ва замонавийлик уйғунлашган, янги ғоялар ва шакллар туғиладиган масканга айланади.
Театрнинг аҳамиятини баҳолаш қийин. У нафақат кўнгиллар, қалблар эшигини очади, балки ўзига хос таълим ҳам берган ҳолда, инсоннинг ботиний онгида мудраб ётган инсоний туйғуларни уйғотади ва фикрлашга ундайди. Тез ўзгарувчан дунё шароитида театр долзарб мавзуларни муҳокама қилишнинг муҳим воситасига айланмоқда. У одамларга ўзларини ва атрофдаги дунёни тушунишга ёрдам беради, шунингдек, мулоқот ва фикр алмашиш учун майдон яратади. Ўзбекистонда театрлар кўпинча маданият, миллий ўзлик ва анъаналар билан боғлиқ ижтимоий масалаларни кўтаради, бу эса уларнинг жамиятимиз учун алоҳида аҳамиятга эга эканлигини кўрсатади.
Ўзбек театрининг кейинги йилларда эришаётган ютуқлари таҳсинга сазовор. Кўп йиллар давомида театрларимиз халқ анъаналари ва замонавий санъат шаклларини ўзида мужассам этган бой меросни намойиш этиб келмоқда. Театр деб аталмиш санъат масканлари мамлакат маданий бойлигининг рамзига айланган. Улар узоқ вақт хотирада қоладиган ёрқин спектакллари билан томошабинларни мамнун этади. Актёр ва режиссёрларимиз ўз истеъдоди ва ижодкорлиги билан яратган ноёб асарлар нафақат Ўзбекистонда, балки хорижда ҳам эътироф этилмоқда.
Театр санъатининг муҳим жиҳати ёш истеъдодлар билан ишлашдир. Ўзбекистонда ёш актёр ва режиссёрларнинг маҳоратини оширишга кўмаклашадиган кўплаб театр мактаблари ва студиялари мавжуд. Бу муассасалар янги авлод ижодкорларини тайёрлашда муҳим ўрин тутади. Улар ўсиш ва ривожланиш учун шароит яратади, шунингдек, ёшларни янги санъат асарларини яратишга чорлайди. Ёш санъаткорлар театр санъатига янгича ғоялар ва ёндашувларни олиб кириб, уни янада ранг-баранг ва қизиқарли қилаётганини кузатмоқдамиз.
Халқаро театр куни нафақат театр ходимлари, балки санъатни севувчилар учун ҳам байрамдир. Бу театрнинг ҳаётимизга қандай таъсир кўрсатиши, одамларни бирлаштириши ва бир-биримизни яхшироқ тушунишга ёрдам беради. Ўзбекистонда театр санъатини ривожлантириб, томошабинларни жалб қилиб келаётган кўплаб истеъдодли актёр, режиссёр ва драматурглар борлиги билан фахрлансак арзийди.
Бу кунда актёр ва актрисалар, драматурглар, режиссёрлар, рассом-безакчилардан ташқари, саҳна ортида меҳнат қилаётган барча инсонларни: дирижёрлар, овоз режиссёрлари, грим усталари, либос билан таъминловчилар, чироқ усталари, суфлёр ва бошқа ходимларни ҳам эслаймиз. Уларнинг меҳнати кўпинча эътибордан четда қолади, бироқ айнан улар театр сеҳрини яратишади. Ҳар бир спектакль жамоавий ишнинг самараси бўлиб, жамоа ҳамжиҳатликда театрни жонлантириб, янада қизиқарли бўлишига ҳисса қўшишади.
21-март – Наврўз кунидан эътиборан то 27-март – Халқаро театр кунигача бир ҳафта мобайнида юртимизнинг барча театр вакиллари халқимиз учун бепул томошалар намойиш этишгани ҳам аҳолимизнинг театр санъатига бўлган ошуфталигини яна бир карра намоён қилди.
Шунингдек, ушбу кундан Ўзбекистонда театр келажаги ҳақида фикр юритиш учун ҳам фойдаланишимиз мумкин. Театр санъатини қандай қўллаб-қувватлашимиз ва ривожлантиришимиз мумкин? Қандай қилиб кўпроқ томошабинларни жалб этиш ва улар билан мулоқотнинг янги шаклларини яратиш мумкин? Эҳтимол, театрларга кўп сонли мухлисларни қамраб олиш ва санъаткорлар ишига ёрдам бериш учун замонавий, янги технологияларни жорий этиш, улардан самарали фойдаланиш вақти келгандир?!
Зеро, Халқаро театр куни – санъатнинг қудратини эслатиб турувчи байрамдир. У бизни ижодга ундайди ва театр санъатини қўллаб-қувватлаш ҳамда ривожлантиришнинг нақадар муҳимлигини англашга ёрдам беради. Ушбу байрамни ютуқларимиз билан фахрланган ҳолда, келажакка умид билан қараганча нишонлайлик. Токи, Театрларимиз барҳаёт бўлсин ва актёр ҳамда актрисаларимиз ўзларининг турли сиймоларда намоён бўлишлари, ибратли воқеаларни акс эттиришлари орқали барчамизга илҳом бахшида этаверишсин!
Театрнинг фидойи ва жонкуяр ходимлари! Барчангизни байрам билан чин юракдан табриклаймиз! Сизлар билан фахрланамиз!
Камоли эҳтиром ила –
Музаффар МУҲАММАДНАЗАР.
Комментарии